Комисијата за хартии од вредност на Република Северна Македонија на 137-та седница со која претседаваше Претседателот на КХВ М-р Нора Алити, даде согласност на  измените и дополнувањата на Правилата за тргување на Македонска Берза АД Скопје.  Со нив, се воведуваат два нови типови на налози за тргување -,,пазарен во лимитиран налог,, и ,,стоп налогот,, со кои инвеститорите ќе имаат поголем избор при реализирање на своите цели. Истовремено се укинува ,,налогот по најповолна цена,,.

Заради долгиот временски период од 90 дена за важењето на налозите кој влијае врз динамиката, се крати рокот на 30 денови. Како причина за намалување на временското важење на налозите е и усогласување со новите законски измени кои се однесуваат на уредување на начинот на работа со посебната сметка од страна на овластените учесници. Исто така, дополнително јасно се допрецизираат правилата за регулирање на начинот на запишување на јавно понудени хартии од вредност преку Берза, а се додефинираат и условите за  организирање на јавна берзанска аукција на акции во сопственост на државата и на акции при продажба на големи пакети на акции. Измените и дополнувањата на Правилата за тргување ќе почнат да се применуваат 10 работни дена од денот на конечноста/правосилноста на Решението на Комисијата за хартии од вредност. Заради подолготрајна подготовка на имплементацијата на новите налози во БЕСТ системот, ,,пазарен во лимитиран налог, и ,,стоп налогот,, ќе стартуваат 45 работни дена од конечноста/правосилноста на Решението на КХВ.

На седницата што се одржа денеска на 9 февруари, 2022 година, Комисијата донесе две решенија,  со кои констатира дека еден кандидат ги исполнува условите за полагање на стручен испит за работење со хартии од вредност од 20-тата обука  на КХВ, а еден за полагање на стручен испит за инвестициско советување од 10 тата обука.