Комисијата за хартии од вредност на Република Северна Македонија на 136-та седница со која претседаваше Претседателот на КХВ М-р Нора Алити, а се одржа денеска на 31 јануари, 2022 година разгледа и донесе 2 подзаконски акта и тоа:

1. Предлог Правилник за содржината на договорот за размена на информации и документи меѓу друштвата за управување со главниот фонд и фондот напојувач, договорот за размена на информации помеѓу депозитарните банки на главниот фонд и фондот напојувач и договорот за размена на информации помеѓу овластените ревизори на главниот фонд и фондот напојувач.

Со  него поблиску се уредува содржината на договорот за размена на информации и документи помеѓу:

- друштвата за управување на главниот фонд и фондот напојувач, односно интерните правила на друштвото за управување со отворени и затворени инвестициски фондови ,на главниот фонд и фондот напојувач;

- депозитарните банки на главниот фонд и фондот напојувач и

- овластените ревизори на главниот фонд и фондот напојувач.

Со овој Правилник се врши усогласување со членовите од 8 до 19, 24, 25, 27 и 28 од Директивата на Комисија 2010/44/EУ од 1 јули 2010 година за спроведување на   Директивата 2009/65/ЕЗ на Европскиот парламент и на Советот, поврзана со определени одредби за припојување или спојување на инвестициските фондови, структурата на главниот фонд и фондот напојувач и постапката за информирање.

 2. Предлог Правилник за кадровска, техничка и организациона оспособеност потребни за основање и работа на друштво за управување со отворени и затворени инвестициски фондови;

 Со овој Предлог Правилник детално се пропишува кадровската, техничката и организационата оспособеност за основање и работа на друштвото за управување со отворени и затворени инвестициски фондови, како и се уредува потребната документација со која истата се докажува пред Комисијата за хартии од вредност .

И двата подзаконски акта, КХВ  ги стави на јавна расправа во времетраење од 30 дена со цел заинтересираните страни да ги дадат своите забелешки и сугестии.