Комисијата за хартии од вредност на Република Северна Македонија на 135-та седница со која претседаваше Претседателот на КХВ М-р Нора Алити, а се одржа денеска на 17 јануари, 2022 година донесе Предлог Одлука со која се пропишува начинот на работа со посебната сметка согласно член 123 став 3 од Законот за хартии од вредност  (сметка за порамнување) која правните лица кои вршат услуги со хартии од вредност со дозвола за работење добиена од Комисијата за хартии од вредност на Република Северна Македонија ја отвораат во Народната Банка на Република Северна Македонија со намена за уплата на паричните средства на клиентите за плаќање на обврските за купените хартии од вредност и исплата на паричните средства добиени од продажбата на хартиите од вредност на клиентите. Оваа Предлог Одлука ќе и биде доставена на разгледување на брокерската заедница со цел овластените учесници да ги дадат своите забелешки и коментари, по што Комисијата конечно ќе ја усвои.

     На седницата, КХВ финално го донесе Правилникот за начинот на вршење на работите на управување со средства (портфолио) по налог и за сметка на индивидуален клиент и инвестиционо советување и за хартиите од вредност и другите финансиски инструменти во кои може да се вложуваат средствата на клиентот за кој претходеше 30 дневна јавна расправа. Потребата за носење на овој подзаконски акт произлезе од претпоследните измени и дополнувања на Законот за инвестициски фондови, а со него се врши усогласување со Директивата на Европската комисија 2006/73 / ЕЗ од 10 август 2006 година за спроведување на Директивата 2004/39 / ЕЗ на Европскиот парламент и на Советот во однос на организациските барања и услови за работа на инвестициските друштва и поимите дефинирани за потребите на таа Директива.

Исто така, Комисијата  усвои 21 решение за исполнување на условите за полагање на стручниот испит за инвестиционо советување  и 10 за работење со хартии од вредност.