Комисијата за хартии од вредност на Република Северна Македонија на 131- вата седница со која претседаваше Претседателот на КХВ М-р Нора Алити по завршена расправа го донесе Правилникот за начинот на работење на друштвото за управување со отворени и затворени инвестициски фондови, за начинот на мерење и управување со ризиците кои произлегуваат од работата на отворените и затворените инвестициски фондови и за методологијата за мерење на ризиците од вложувањата во финансиски деривативни инструменти. Потребата за донесување на овој подзаконски акт произлезе од последните измени и дополнувања на Законот за инвестициски фондови со кои се врши усогласување со Директивата 2009/65/ЕЗ на Европскиот парламент и на Советот од 13 јули 2009 година. Согласно член 190 од Законот за хартии од вредност, јавната расправа по Предлог правилникот траеше 30 календарски дена во кои заинтересираните страни не истакнаа коментари.

         Исто така, на седницата што се одржа на 16.12.2021 година, КХВ донесе Решение со кое на Друштвото за управување со инвестициски фондови ,,Генерали Инвестментс" АД Скопје му даде согласност административните работи кои се однесуваат на водење на деловни книги и сметки и изготвување на финансиски извештаи, предвидени со Законот за инвестициски фондови да ги пренесе на правното лице Друштво за сметководствени услуги, консалтинг и трговија ,,УНИЈА СМАРТ АКАУНТИНГ" ДОО Скопје . ,,УНИЈА СМАРТ АКАУНТИНГ" ДОО Скопје ќе ги извршува сите активности во име и за сметка на ,,Генерали Инвестментс" АД Скопје, а одговорноста во целост останува кај  Друштвото за управување со инвестициски фондови. Откако Стручната служба гo обработи барањeто за добивање дозвола за работење на инвестициски советник  и констатираше дека се исполнети сите услови утврдени во Законот за хартии од вредност и во Правилникот за формата, содржината на барањето и потребната документација за добивање на дозвола за работење на брокер и дозвола за работа на инвестициски советник, Комисијата за хартии од вредност  издаде една лиценца за инвестициски советник. Дозволата се дава за период од пет години од денот на издавањето.