Комисијата за хартии од вредност на Република Северна Македонија на 130- тата седница со која претседаваше Претседателот на КХВ М-р Нора Алити  го одби барањето  од лицата Војциецх Едвард Пилцх и Бигосински Јацек, двајцата од Република Полска, за давање понуда за преземање на акциите издадени од ,,Тајмиште АД Кичево.

Решението за одбивање на барањето, Комисијата го донесе врз основа на член 31, а во врска со член 21 став 6 од Законот за преземање на акционерските друштва, бидејќи преземачите Војциецх Едвард Пилцх и Бигосински Јацек не постапиле согласно законската обврска за обезбедување на паричните средства или банкарска гаранција пред да дадат понуда за преземање, односно не докажаа дека се исполнети условите од член 31 став (2) од Законот за преземање на АД  и поради тоа се смета дека се откажале од намерата за преземање. Инаку, лицата Војциецх Пилцх и Бигосински Јацек во октомври 2021 година ја известија Комисијата за хартии од вредност дека имаат намера да дадат понуда за преземање на сите обични акции со право на глас издадени од Тајмиште АД Кичево по цена од 970 денари по акција. Намерата беше објавена на интернет страницата на Македонска берза АД Скопје, Службен весник и во еден дневен печат. Согласно член 25 од Законот, овие лица не можат да дадат нова понуда пред истекот на една година од денот на откажување на намерата. На седницата шо се одржа денеска на 30 ноември, 2021 година, КХВ  го разгледа и го донесе Предлог Правилникот за начинот на вршење на работите на управување со средства (портфолио) по налог и за сметка на индивидуален клиент и инвестиционо советување и за хартиите од вредност и другите финансиски инструменти во кои може да се вложуваат средствата на клиентот. Со овој подзаконски акт, поблиску се пропишуваат организационите барања за овластениот учесник на пазарот на хартии од вредност и за друштвото за управување со отворени и затворени инвестициски фондови кои мора да бидат исполнети заради обезбедување на законито и ефикасно работење и сведување на ризикот на најмала можна мера. Предлог Правилникот е ставен на јавна расправа во траење од 30 дена со цел засегнатите да ги кажат своите забелешки и коментари, а треба да почне да се применува од 01.04.2022 година.