Комисијата за хартии од вредност на Република Северна Македонија на 111-тата седница со која претседаваше Претседателот на КХВ М-р Нора Алити донесе решение со кое се дава согласност на ДУИФ Генерали инвестментс АД Скопје за пренос на активности, предвидени со член 6 став 1 од Законот за инвестициски фондови, а кои се поврзани со продажба и/или откуп на удели во инвестициски фондови и извршување на активности на рекламирање на инвестициските фондови на правното лице НЛБ Банка АД Скопје.

Исто така Комисијата даде одобрение на ДУИФ Генерали инвестментс АД за избор на НЛБ Банка АД Скопје за депозитарна банка на инвестициските фондови Генерали Брик, Генерали Нова ЕУ, Генерали Кеш Депозит и Генерали Топ Брендови.

На седницата Комисијата донесе Решение со кое се дава согласност на Загребачка бурза Д.Д Загреб да стекне квалификувано учество во Македонска берза АД Скопје, односно да се стекне со акции чиј вкупен кумулативен износ не надминува 20% од вкупно издадените акции со право на глас од Македонска берза АД Скопје.

Согласно барањето за добивање согласност за стекнување на квалификувано учество во Македонска берза АД Скопје и Одлуката на Надзорниот одбор на Загребачка бурза Д.Д Загреб, Загребачка бурза Д.Д Загреб има намера да стекне 276 акции, односно 9,89% од акциите на Македонска берза АД Скопје со што процентуалното учество би се зголемило од 5,30% на 15,19% од акциите на берзата. Трансакцијата за стекнување на акциите треба да се изврши во рок од 90 календарски денови од денот на добивање на согласноста.

Тргнувајќи од фактот дека согласно Законот за инвестициски фондови, Комисијата за хартии од вредност не го одобрува основањето на приватните фондови, ниту пак е надлежна за спроведување контрола и надзор на нивната работа, туку само врши запишување на приватните фондови во Регистарот на приватни фондови, Комисијата го запиша приватниот инвестициски фонд ГБ Платинум Инвестмент во Регистарот на приватни фондови кој го води Комисијата и му додели идентификациски број.

На седницата што се одржа денеска на 22 јуни, 2021 година, Комисијата на Интерпромет АД Тетово му даде одобрение за продажба на сопствени акции по пат на јавна понуда – 2.686 обични акции во вкупен номинален износ од 137.335,18 евра и вкупна минимална продажна вредност од 8.058.000 денари.

На седницата Комисијата усвои и 2 Правилника по завршена јавна расправа.