Комисијата за хартии од вредност на Република Северна Македонија на 98. седница со која претседаваше претседателката на КХВ, м-р Бујаре Абази, донесе  Решение со кое на Силк Роуд Банка АД Скопје ѝ даде одобрение за издавање на 6.102 обични акции во вкупна вредност на емисијата од 220.349.322 денари по пат на приватна понуда, наменета за познат купувач - единствениот акционер на банката. Со дванаесеттата емисија на обични акции, Силк Роуд Банка АД Скопје врши зголемување на основната главнина со трансформирање на хибриден инструмент (заем) даден од страна на единствениот акционер на банката, Силк Роуд Капитал АГ, Баар, Швајцарија, во влог во банката, во согласност со Законот за трговските друштва, Законот за банките и Законот за хартии од вредност и подзаконските прописи.
На седницата што се одржа денес, 30 септември 2026 година,  КХВ донесе решенија со кои им даде согласност на Александра Митев, Сашо Дракуловски и Стефан Степаноски за стекнување квалификувано учество во брокерската куќа ЕУРОХАУС АД Скопје. Со решенијата се одобрува Александра Митев да се стекне со акции чиј вкупен кумулативен износ не надминува 50 проценти од вкупно издадените акции со право на глас во друштвото, а Сашо Дракуловски и Стефан Степаноски поединечно да се стекнат со акции до 30 проценти од вкупно издадените акции со право на глас. Трансакциите за стекнување на акциите треба да се извршат во рок од 90 календарски дена од денот на добивање на согласноста. По истекот на овој рок за стекнување акции е потребна нова согласност од Комисијата. 
Исто така, КХВ даде согласност лицето Катерина Илиќ Нонкуловска да биде именувана за раководител на услуги со хартии од вредност при Финансиски пазари, инвестиционо банкарство и старателство во НЛБ Банка АД Скопје и во наредните четири години.
Комисијата разгледа и усвои пакет на подзаконски акти што произлегуваат од Законoт за финансиски инструменти и  Законот за проспекти и обврски и транспарентност за издавачите на хартии од вредност и тоа:
1. ПРЕДЛОГ-ПРАВИЛНИК за списокот на лицата кои имаат пристап до внатрешни информации и трансакции на лица кои извршуваат раководни функции;
2.  ПРЕДЛОГ-ПРАВИЛНИК за утврдување на исклучок за програмите за откуп и мерките за стабилизација и за прифатена пазарна пракса;
3.ПРЕДЛОГ-ПРАВИЛНИК за постапките за спречување и откривање на пазарни злоупотреби;
4.ПРЕДЛОГ-ПРАВИЛНИК за санација на овластен депозитар;
5. ПРЕДЛОГ-ПРАВИЛНИК за начинот на процена на видовите и значајноста на факторите на ризик и начинот на претставување на факторите на ризик во Проспектот по одделни категории во зависност од нивната природа;
6. ПРЕДЛОГ-ПРАВИЛНИК за начинот на рекламирање во врска со јавна понуда и/или прием на хартии од вредност за тргување на регулиран пазар и
7.  ПРЕДЛОГ-ПРАВИЛНИК за известување  во врска со стекнување или отуѓување на значајни учества.
Подзаконските акти ќе бидат објавени на јавна расправа на веб-страницата на КХВ, со цел во рок од 30 дена заинтересираните страни да дадат забелешки во однос на предложените текстови на правилниците.