Комисијата за хартии од вредност на Република Северна Македонија на 92. седница со која претседаваше претседателката на КХВ, м-р Бујаре Абази, донесе Решение со кое на  на ТТК Банка АД Скопје и даде одобрение за издавање на долгорочни хартии од вредност по пат на јавна понуда – четврта  емисија на 1.500 корпоративни обврзници со поединечна номинална вредност од 1.000 евра.   Каматната стапка на долгорочните должнички хартии од вредност како капитален инструмент ќе изнесува 4,75% фиксна за целиот период.

Емисијата на обврзници на ТТК Банка АД Скопје се врши заради зајакнување на капиталната сила и вкупниот финансиски потенцијал на банката со што истата планира да ги оствари утврдените бизнис цели од Деловната политика, развојниот и финансиски план за период 2025-2027 година.

На седницата што се одржа денес, 15 јули 2026 година, Комисијата донесе Решение со кое на лицето Васко Богдановски му се дава согласност за именување за извршен член на Одборот на директори - главен извршен директор на Друштвото за управување со отворени и затворени инвестициски фондови ОПФОЛИО ИНВЕСТИЦИИ АД Скопје. Согласноста  на  Васко Богдановски се дава за период од четири   години.

Исто така, Комисијата за хартии од вредност му даде согласност на Стефан Степаноски и во наредните шест години да ја извршува функцијата  директор на брокерската куќа ЕУРОХАУС АД Скопје.