Комисијата за хартии од вредност на Република Северна Македонија на 88. седница со која претседаваше   претседателката на КХВ, м-р Бујаре Абази, донесе Решение со кое на Финансиското друштво ИУТЕ КРЕДИТ МАКЕДОНИЈА ДООЕЛ Скопје му се дава одобрение за издавање долгорочни должнички хартии од вредност по пат на јавна понуда - прва емисија на 30.000 корпоративни обврзници со поединечна номинална вредност од 100 евра и вкупна номинална вредност од 3.000.000 евра. Каматната стапка на долгорочните должнички хартии од вредност за целиот период е фиксна и ќе изнесува 8,5 % на годишно ниво. Емисијата на обврзници на ИУТЕ КРЕДИТ МАКЕДОНИЈА ДООЕЛ Скопје се врши со цел оптимизација  на трошоците на финансирање и диверзификација, како и проширување на изворите на капитал. 

На седницата што се одржа денес, 5 јуни 2026 година, Комисијата даде согласност Михајло Брова Зиков да продолжи да ја извршува функцијата директор на Дирекцијата за вршење услуги со хартии од вредност на Комерцијална Банка АД Скопје и во наредните шест години.
Во согласност со Законот за инвестициски фондови, КХВ ги одобри измените и дополнувањата на Статутот на Друштвото за управување со отворени и затворени инвестициски фондови Иново Статус АД Скопје. Измените и дополнувањата на Статутот се вршат поради промени во сопственоста на друштвото.

КХВ обнови една дозвола за работење на инвестициски советник и една за работење со хартии од вредност. Исто така, поаѓајќи од зголемениот интерес и недостигот на стручен кадар на пазарот на капитал, КХВ одлучи да организира четиринаесетта обука за инвестициско советување и дваесет и четврта обука за работење со хартии од вредност.