Комисијата за хартии од вредност на Република Северна Македонија, на 87. седница со која претседаваше претседателката на КХВ, м-р Бујаре Абази, донесе Решение со кое на ПроКредит Банка АД Скопје ѝ даде одобрение за издавање долгорочни хартии од вредност по пат на приватна понуда. Се работи за прва емисија на една перпетуална обврзница со поединечна и вкупна номинална вредност од 5.000.000 евра, односно 308.475.000,00  денари. Продажната цена нa перпетуалната обврзница е еднаква на номиналната и се нуди по цена од 5.000.000 евра. Перпетуалната обврзница е наменета за познат купувач - институционалниот инвеститор ПроКредит Холдинг АГ, Франкфурт, Сојузна Република Германија. Во согласност со одлуката од Собранието на акционери на банката, обврзницата што се издава е субординирана, необезбедена, пренослива и без рок на доспевање. Издадениот капитален инструмент ќе се користи како додатен основен капитал на банката и произлегува од потребата за континуирано зголемување на капиталот во корелација со проектираниот раст на активата, зголемените капитални барања од регулаторот  и стратегиската оптимизација на структурата на капиталот.

       На седницата што се одржа денес, 21 мај 2026 година, КХВ даде согласност на измените на Проспектот на отворениот инвестициски фонд Опфолио Паричен Фонд, со кои Друштвото за управување со отворени и затворени инвестициски фондови Опфолио Инвестиции АД Скопје врши корекција на целите и на инвестициската политика на фондот што претставува значајна промена и во согласност со Законот за инвестициски фондови е предмет на одобрение од страна на Комисијата.  Исто така, КХВ даде одобрение и на измените и  дополнувањата на Статутот на Опфолио Паричен Фонд, со кои се врши проширување на дозволените вложувања на фондот.
 
Комисијата за хартии од вредност го разгледа и го усвои и Годишниот извештај за работата на Комисијата за 2025 година, во кој се презентирани активностите, резултатите и состојбите на пазарот на капитал во текот на извештајната година.