Комисијата за хартии од вредност на Република Северна Македонија на 43-тата седница со која претседаваше Претседателката на  КХВ М-р Нора Алити  донесе Решение со кое на Комерцијална банка АД Скопје и  издаде  дозвола за давање понуда за преземање на Стопанска банка АД Битола.  

       Понудата за преземање се однесува на 390.977 обични акции со право на глас издадени од Стопанска банка АД Битола, кои претставуваат 100% од основната главнина на  Стопанска банка АД Битола. Преземањето на хартиите од вредност ќе се врши по цена од 3.200 денари по акција. Согласно Понудата за преземање, а според Законот за преземање на акционерски друштва,  преземачот утврдил најмала количина на обични акции на кои се однесува понудата за преземање која треба да биде прифатена за понудата да се смета за успешна, односно понудата ќе се смета за успешна доколку биде прифатена од акционери кои поседуваат најмалку 261.956 обични акции кои претставуваат 67% плус една акција од вкупниот број обични акции со право на глас издадени од Стопанска банка АД Битола. Рокот за прифаќање на понудата за преземање започнува да тече од денот на првото објавување на понудата за преземање и изнесува 28 календарски дена.

      На  седницата што се одржа денеска на 22 август, 2024 година, Комисијата издаде една дозвола за работење на инвестициски агент коj има склучено договор за продажба на удели со КБ Инвест АД Скопје.