Комисијата за хартии од вредност на Република Северна Македонија на 126 тата седница со која претседаваше Претседателот на КХВ М-р Нора Алити даде согласност за именување на Драган Илкоски за раководител-директор на Службата за услуги со хартии од вредност при Деловниот сектор за финансиски пазари и средства на "НЛБ Банка" АД Скопје. Согласно Одлуката за именување раководно лице и утврдување мандат на "НЛБ Банка" АД Скопје, согласноста на Драган Илкоски важи за период од 12 месеци.
       Исто така, на седницата што се одржа денеска на 8 ноември, 2021 година, Комисијата го разгледа и усвои Предлог Правилникот за начинот на работење на друштвото за управување со отворени и затворени инвестициски фондови, за начинот за мерење и управување со ризиците кои произлегуваат од работата на отворените и затворените инвестициски фондови и за методологијата за мерење на ризиците од вложувањата во финансиски деривативни инструменти, по што го стави на јавна расправа на својата веб страница за во рок од  30 календарски дена, засегнатите страни да ги кажат евентуалните забелешки. Целта на овој подзаконски акт е да обезбеди друштвата за управување да работат законито и уредно во согласност со Законот за инвестициски фондови, како и  намалување на ризикот од работењето. Овој Правилник е усогласен со Директивата на Европскиот Парламент 2010/43/ EC за имплементирање на Директивата 2009/65/EC за структурите и организациските барања, судир на интереси, работењето и содржината на  договорите помеѓу депозитарна банка и друштвата за управување, како и критериумите  за проценка на соодветноста на процесот на управување на ризик кои ги користи друштвото за управување, политиките и процесите за управување со ризици и мерките, процесите и техниките за мерење на ризикот и управувањето со ризиците кои се однесуваат на таквите критериуми.