Комисијата за хартии од вредност на Република Северна Македонија на 12-тата седница со која претседаваше  Претседателкaта на КХВ М-р Нора Алити донесе Решение  со кое  на Халк Осигурување АД Скопје му се дава одобрение за издавање на долгорочни хартии од вредност по пат на приватна понуда . Станува збор за деветта емисија на 300.000 нови обични акции со вкупен износ на емисијата од 3.000.000 евра, во денарска противвредност. Зголемувањето на основната главнина со нови парични влогови се врши за познат купувач – институционалниот инвеститор Халк банка АД Скопје кој воедно е и акционер на Друштвото. Друштвото издава нови акции заради задржување на потребната адекватност на капиталот на Друштвото и создавање на услови за непречено вршење на редовното работење.

Исто така, КХВ на УНИ Банка АД Скопје и даде  одобрение да ја издаде третата емисија на 1.350 перпетуални обврзници . Продажната цена е еднаква на номиналната, па  перпетуалните обврзници се нудат по цена од 1.000 евра за обврзница односно вкупната вредност на понудата изнесува 1.350.000 евра. Согласно Одлукатa, издадениот капитален инструмент ќе се користи како додатен основен капитал од ниво 1, а средствата од емисијата ќе се користат за општи корпоративни цели, односно за поддршка на кредитниот пораст на банката.  
Обврзницата што се издава е некумулативна, неконвертибилна,пренослива,субординирана, необезбедена, трајна и со фиксна каматна стапка. Обврзниците не се гарантирани, односно не се покриени со друг вид на обезбедувања од страна на банката или лице поврзано со банката. Обврзниците имаат фиксна каматна стапка од 6% на годишно ниво за првите 5 години од датумот на издавање (датумот на регистрирање на обврзницата во ЦДХВ), а после тој период каматната стапка се зголемува за 2 процентни поени и изнесува 8% на годишно ниво.

На седницата што се одржа денеска на 16 октомври, 2023 година, Комисијата за хартии од вредност одзема четири дозволи за работење на инвестициски агент.