Комисијата за хартии од вредност на Република Северна Македонија на 145-тата седница со која претседаваше Претседателот на КХВ М-р Нора Алити донесе Решение за издавање дозвола за понуда за преземање на осигурителното брокерско друштво СН Осигурителен Брокер АД Битола.

Понудата за преземање е дадена од страна на лицата Христо Кондовски и Зоран Пејчиновски, а се однесува на 6.816 обични акции со право на глас издадени од СН Осигурителен Брокер АД Битола, кои претставуваат 24,9762% од основната главнина на осигурителното брокерско друштво. Вкупниот број на акции издадени од СН Осигурителен Брокер АД Битола изнесува 27.290 обични акции, а во моментот на поднесување на понудата за преземање, преземачите Христо Кондовски и Зоран Пејчиновски поседуваат  20.466 обични акции што претставува 74,9945% од основната главнина на СН Осигурителен Брокер АД Битола, а друштвото има откупено и 8 сопствени акции, на кои не се однесува понудата за преземање. Понудата за преземање во име и за сметка на преземачите ја дава брокерската куќа Инвестброкер АД Скопје. Преземањето на хартиите од вредност ќе се врши по цена од 4.761 денар по акција.

Рокот за прифаќање на понудата изнесува 28 дена од денот на објавувањето. Согласно Понудата за преземање, преземачот не утврдил најмала количина на обични акции на кои се однесува понудата за преземање која треба да биде прифатена за истата да се смета за успешна.

Откако Стручната служба ги разгледа поднесените пријави од Друштвото за управување со приватни инвестициски фондови ЕКОНОМИК ДЕВЕЛОПМЕНТ ДОО СКОПЈЕ и од Друштвото за управување со приватни инвестициски фондови ИНДУСТРИАЛ ИНОВАТИОН ДОО за запишување во Регистарот на приватни фондови кој го води Комисијата на својата веб страна, КХВ им утврди нови единствени, непроменливи и неповторливи идентификациски броеви на два приватни инвестициски фодови и тоа на:

1. НОРТ МАЦЕДОНИА ЕКОНОМИК ДЕВЕЛОПМЕНТ и
2. НОРТ МАЦЕДОНИА ИНДУСТРИАЛ ИНОВАТИОН

По завршена јавна расправа, Комисијата го усвои Правилникот за кадровска, техничка и организациона оспособеност за основање и работа на овластено правно лице за вршење услуги со хартии од вредност. На седницата што се одржа денеска на 20 април, 2022 година КХВ издаде една дозвола за работење на инвестициски  советник за период од 5 години.