Комисијата за хартии од вредност на Република Северна Македонија на 143-та седница со која претседаваше Претседателот на КХВ М-р Нора Алити  донесе Решение  со кое на Акционерското друштво за вршење на енергетски дејности Национални Енергетски Ресурси Скопје во државна сопственост му даде одобрение за издавање на долгорочни хартии од вредност - по пат на приватна понуда. Со десеттата емисија на акции НЕР АД Скопје ќе издаде 101.303 обични акции со продажна вредност од 100 евра по акција и со вкупен износ од 10.130.300 евра, односно 624.998.988,8 денари. Зголемувањето на основната главнина со нови влогови се врши по пат на приватна понуда наменета за познат купувач, постојниот единствен акционер - Влада на Република Северна Македонија, како институционален инвеститор.Друштвото издава хартии од вредност заради зголемување на основната главнина, односно заради создавање услови за непречено функционирање.

      Исто така, КХВ донесе Решение со кое се утврдува за успешна понудата за преземање на акции издадени од Друштвото за производство и промет со земјоделски и сточарски производи ВАРДАР АД Градско дадена од Друштвото за производство, трговија и услуги ГРИНИНГ ДОО Скопје. Понудата за преземање била прифатена од еден сопственик на обични акции со право на глас во Вардар АД Градско, кој поседува вкупно 706.110 обични акции, што претставува 51,01% од вкупниот број на обични акции со право на глас издадени од Вардар АД Градско. Заедно со акциите што веќе ги поседуваше (345.900 обични акции) преземачот има вкупно 1.052.010 обични акции што претставува учество од 76,00% од вкупниот број обични акции (1.384.223) издадени од Вардар АД Градско.

     Откако беше утврдено дека  три приватни  фондови не ги исполнуваат условите согласно Законот за инвестициски фондови и неговите подзаконски акти, КХВ ги избриша од Регистарот на приватни фондови. Станува збор за:

      1. Развоен фонд БС;
      2. Редгласс Инвестментс и
      3. ГБ Платинум Инвестмент.

Со бришењето на овие три приватни фондови, во Регистарот што го води КХВ  се водат уште 14.

На седницата што се одржа денеска на 4 април, 2022 година, Комисијата даде согласност на измените и дополнувањата на Статутот на Друштвото за управување ВФП Фонд Менаџмент АД Скопје со кои се врши негово усогласување со одредби од Законот за измени и дополнувања на Законот за инвестициски фондови од јули 2021 година, како и имплементирање на одредба од Законот за трговските друштва која се однесува на  можноста за гласање со кореспонеденција на Собранието на акционери.