Комисијата за хартии од вредност на Република Северна Македонија на 141-та седница со која претседаваше Претседателот на КХВ М-р Нора Алити на Друштвото за управување со отворени и затворени инвестициски фондови "ВЕГА ФОНДОВИ" АД Скопје му даде одобрение за организирање на четири отворени инвестициски фондови  и тоа еден паричен и три акциски:

1. ВЕГА КЕШ-отворен инвестициски фонд;

Овој фонд  е паричен и наменет е за сите оние инвеститори кои не сакаат да превземат висок ризик, имаат намера да ја зачуваат вредноста на капиталот или да го користат фондот како алатка за управување со тековната ликвидност.

 2.ВЕГА ФИНАНСИИ- отворен инвестициски фонд;

Фондот е акциски и е за инвеститори кои сметаат дека вложувањето во финансиски институции е најдобар избор за инвестирање на нивниот капитал и кои сакаат да ги вложат своите средства во период од најмалку 5 години.

3.ВЕГА ТЕХНОЛОГИЈА- отворен инвестициски фонд;

Овој акциски фонд  е наменет за инвеститори кои сакаат да постигнат баланс меѓу брзорастечки компании кои поставуваат нови трендови и веќе добро изградени докажани компании кои имаат висока предвидливост во работењето и кои сакаат да ги вложат  своите средства во период од најмалку 5 години.

4.ВЕГА СВЕТ-отворен инвестициски фонд;

Во овој акциски фонд, својот инвеститорски интерес можат да го најдат сите кои сакаат да остварат атрактивен принос преку искористување на глобалниот раст на светската економија и тоа за период од најмалку 5 години. 

Инаку, нето вредноста на ВЕГА КЕШ може да биде инвестирана во депозити, односно должнички хартии од вредност чија претежна дејност се врши во: Северна Македонија- до 100% од портфолиото, САД-до 100% од портфолиото, земји членки на ЕУ-до 100% од портфолиото, земји членки на ОЕЦД-до 100% од портфолиото. Додека пак, средствата на ВЕГА ФИНАНСИИ, ВЕГА ТЕХНОЛОГИЈА и ВЕГА СВЕТ  ќе бидат вложувани во хартии од вредност на издавачи чие седиште е на територијата на Северна Македонија-до 100% од портфолиото, САД -до 100% од портфолиото, членки на ЕУ-до 100% од портфолиото и членки на ОЕЦД-до 80% од портфолиото. Депозитарна банка на четирите фондови  е "НЛБ Банка" АД Скопје.  Согласно член 48 од Законот за инвестициски фондови, Комисијата за хартии од вредност, ги запиша во Регистарот на инвестициски фондови. Исто така, КХВ даде согласност на Статутите и Проспектите на четирите отворени инвестициски фондови со кои управува ДУИФ "ВЕГА ФОНДОВИ" АД Скопје.

На седницата што се одржа денеска  на 22 март, 2022 година, Комисијата на Друштвото за управување со отворени и затворени инвестициски фондови "ГЕНЕРАЛИ ИНВЕСТМЕНТС" АД Скопје му даде одобрение за припојување на:
1.ОИФ ГЕНЕРАЛИ КЕШ ФОНД (фонд преносител) кон ОИФ ГЕНЕРАЛИ КЕШ ДЕПОЗИТ (фонд преземач) ;

2.ОИФ ГЕНЕРАЛИ ЈУГОИСТОЧНА ЕВРОПА (фонд преносител) кон ОИФ ГЕНЕРАЛИ НОВА ЕУ (фонд преземач) и

3.ОИФ ГЕНЕРАЛИ ГЛОБАЛ РАСТЕЧКИ ПАЗАРИ (фонд преносител) кон ОИФ ГЕНЕРАЛИ БРИК.

Во трите присоединувања на отворените инвестициски фондови, согласно Проспектите, фондот преносител и фондот преземач имаат слична инвестициска политика, односно целите и нивните инвестициски политики се значително слични и ваквите фондови се во целост компатибилни. Целата постапка на припојување по приемот на одобрението од Комисијата за хартии од вредност ќе трае 45 календарски дена. По спроведената постапка, фондот преносител ќе престане да постои без спроведување на постапка на ликвидација, а сите права и обврски ќе се пренесат на фондот преземач.

Овие припојувања се резултат на извршената статусна промена-присоединување на ДУИФ "Илирика Фунд Менаџмент" АД Скопје кон ДУИФ "ГЕНЕРАЛИ ИНВЕСТМЕНТС" АД Скопје, при што и целокупниот имот, права и обврски на "Илирика Фунд Менаџмент" АД Скопје се пренесени на "ГЕНЕРАЛИ ИНВЕСТМЕНТС" АД Скопје, а "Илирика Фунд Менаџмент" АД Скопје престана да постои без спроведување на постапка за ликвидација.

Откако беше утврдено дека приватниот инвестициски фонд Прима Фондс не ги исполнува условите согласно Законот за инвестициски фондови, КХВ  го избриша од Регистарот на приватни фондови.

Исто така, КХВ за прв пат издаде шест дозволи за работење на инвестициски агент, при што сите лица имаат склучено договори за продажба на удели со ДУИФ "ВФП Фонд Менаџмент" АД Скопје. Дозволите им важат до моментот кога ќе се раскине нивниот договор со Друштвото, со што ќе бидат избришани од Регистарот на инвестициски агенти на КХВ.

Комисијата даде и три лиценци за инвестициски советници. Две лица се вработени во ДУИФ "ВЕГА ФОНДОВИ" АД Скопје, а едно во брокерската куќа "Илирика Инвестментс" АД Скопје.