Комисијата за хартии од вредност на Република Северна Македонија на 138-та седница со која претседаваше Претседателот на КХВ М-р Нора Алити, донесе Решение со кое на Друштвото за производство, трговија и услуги "ГРИНИНГ" ДОО Скопје, му издаде дозвола за давање понуда за преземање на Друштвото за производство и промет со земјоделски и сточарски производи "ВАРДАР" АД Градско.

Вкупниот број на акции издадени од "ВАРДАР" АД Градско изнесува 1.384.223 обични акции, пришто понудата за преземање се однесува на 1.038.323 обични акции со право на глас издадени од "ВАРДАР" АД Градско, кои претставуваат 75,01% од основната главнина на  "ВАРДАР" АД Градско. Во моментот на поднесување на понудата за преземање "ГРИНИНГ" ДОО Скопје поседува 345.900 обични акции од "ВАРДАР" АД Градско. Преземачот се обврзува да ги откупи хартиите од вредност по цена од 131 денар по акција. Рокот за прифаќање на понудата за преземање започнува да тече на денот на објавување на понудата за преземање и завршува 28 дена по започнувањето на рокот за нејзино прифаќање. Согласно Понудата за преземање, преземачот не утврдил најмала количина на обични акции на кои се однесува понудата за преземање која треба да биде прифатена за истата да се смета за успешна.

       Исто така, КХВ донесе Одлука со која се пропишува начинот на работа со посебната сметка согласно член 123 став 3 од Законот за хартии од вредност (сметка за порамнување) која правните лица кои вршат услуги со хартии од вредност со дозвола за работење добиена од Комисијата за хартии од вредност на Република Северна Македонија ја отвораат во Народната Банка на Република Северна Македонија со намена за уплата на паричните средства на клиентите за плаќање на обврските за купените хартии од вредност и исплата на паричните средства добиени од продажбата на хартиите од вредност на клиентите. Претходно, предлог Одлуката беше разгледана од овластените учесници кои имаа можност да ги дадат своите коментари.

       На седницата што се одржа денеска на 24 февруари, 2022 година, КХВ разгледа и усвои два Предлог правилника и тоа:
1. Предлог Правилник за кадровска, техничка и организациона оспособеност за основање и работа на овластено правно лице за вршење услуги со хартии од вредност;

Со овој Предлог Правилник се уредува потребната документација од која може да се оцени кадровската, просторната, техничката и организационата оспособеност за основање на овластено правно лице кое врши услуги со хартии од вредност согласно член 94 од Законот за хартии од вредност

2. Предлог Правилник за формата, содржината и начинот на водење на Регистарот на инвестициски фондови и начинот на утврдување на идентификацискиот број на инвестицискиот фонд ;

Со овој подзаконскиот акт детално се утврдува запишувањето во Регистарот на фондови кој се состои од три подрегистри:

- Регистар на отворени инвестициски фондови (РОИФ) во кој се запишуваат отворените инвестициски фондови;

- Регистар на затворени инвестициски фондови (РЗИФ)во кој се запишуваат затворените инвестициски фондови и

- Регистар на приватни инвестициски фондови (РПИФ) во кој се запишуваат приватните инвестициски фондови.

И двата подзаконски акта, Комисијата ги стави на јавна расправа во наредните 30 дена со цел засегнатите страни да ги кажат своите забелешки и сугестии.

     КХВ издаде една дозвола за работење на брокер и една за инвестициски советник.