Комисијата за хартии од вредност на Република Северна Македонија на 112-тата седница со која претседаваше Претседателот на КХВ М-р Нора Алити донесе решение со кое се дава одобрение за основање на Друштво за управување со инвестициски фондови Вега Фондови АД Скопје, со основна главнина од 130.000 евра во денарски противвредност и со предмет на работење основање и управување со отворени инвестициски фондови, водење на работи на управување со средства за сметка на индивидуален клиент – сопственик на портфолио и инвестиционо советување согласно Законот за инвестициски фондови.

На седницата се даде одобрение и на Статутот на ДУИФ Вега Фондови АД Скопје и согласност на лицето Александра Митев од Скопје да се стекне со квалификувано учество во ДУИФ Вега Фондови АД Скопје, односно да се стекне со акции со право на глас чиј вкупен кумулативен износ не надминува 50% од вкупно издадените акции со право на глас на друштвото. Исто така се даде согласност на лицата Сашо Дракуловски и Стефан Степаноски да се стекнат со квалификувано учество во ДУИФ Вега Фондови АД Скопје односно поединечно да се стекнат со акции со право на глас чиј вкупен кумулативен износ не надминува 30% од вкупно издадените акции со право на глас на друштвото.

На седницата се даде согласност за именување на лицето Сашо Дракуловски за извршен член на Одборот на директори, односно главен извршен директор на ДУИФ Вега Фондови АД Скопје и согласност за именување на лицето Огнен Тилиќ за извршен член на Одборот на директори, односно извршен директор на ДУИФ Вега Фондови АД Скопје.

На седницата со која претседаваше Претседателот на КХВ М-р Нора Алити на Друштвото за трговија и услуги Енерџи Деливери Солушнс АД Скопје му се даде одобрение за издавање на долгорочни хартии од вредност по пат на приватна понуда - втора емисија на 370.000 обични акции во вкупна вредност од 3.700.000 евра, односно во денарска противвредност од 228.271.500 денари.  Зголемувањето на основната главнина на друштвото се врши по пат на трансформирање на заем во влог преку издавање на нови акции од втора емисија на единствениот акционер Паблик Пауер Корпорејшн СА, Атина Р. Грција.