КОМЕНТАРИ НА МАКЕДОНСКА БЕРЗА АД СКОПЈЕ НА ПРАВИЛНИКОТ ЗА ИЗДАВАЊЕ НА ОДОБРЕНИЕ ЗА СТЕКНУВАЊЕ НА КВАЛИФИКУВАНО УЧЕСТВО И ЗА УТВРДУВАЊЕ НА КРИТЕРИУМИТЕ ЗА ПОДОБНОСТ НА СТАКНУВАЧ Во врска со текстот на Правилникот за издавање одобрение за стекнување квалификувано учество и за утврдување на критериуми за подобност на стекнувачот објавен за јавна расправа на интернет страницата на Комисијата за хартии од вредност, Македонска Берза АД Скопје ги дава следните коментари: • Во дефинициите, предлагаме да се даде дефиниција и за „членови на целното друштво„, којшто израз се употребува во член 10, став 1, точка 18 и член 13 став 1 точка 5, а веројатно се мисли на ситуацијата кога целно друштво е инвестициско друштво кое согласно Законот за финансиски инструменти може да се основа како друштво со ограничена одговорност, па членови би биле содружниците. Сметаме дека со дефинирањето на поимот ќе биде појасно за што станува збор. • Во член 9, став 1, точка 13 кој се однесува на потребната документација кога стекнувачот на квалификувано учество е физичко лице, како и член 10, став 1, точка 18 кој се однесува на потребната документација кога стекнувачот на квалификуваното учество е правно лице е, меѓу другото е наведено дека треба да се даде опис на финансиските и нефинансиските интереси и односи на стекнувачот со сите акционери во целното друштво. Сметаме дека исполнувањето на овој услов може да биде доведено во прашање во случаите кога стекнувачот е физичко или правно лице кое во моментот не поседува акции во целното друштво поради што и не може да има информација за тоа кои други лица се акционери во целното друштво и поради тоа да не може да даде соодветна на информација за финансиските и нефинансиските интереси и односи со тие лица; • Во член 10, став 1, точка 4 е предвидено дека треба да се достави информација за сите лица кои би можеле да се сметаат за вистински сопственици на правното лице. Со цел прецизирање на одредбата, предлагаме истата да се преформулира во смисла дека е потребна информација за сите лица кои се запишани како вистински сопственици во соодветните регистри на вистински сопственици. • Во член 10, став 1, точка 20 е предвидено дека е потребно да се достават информации за сите договори меѓу акционерите кои имаат значајно влијание и членовите на органите на управување. Сметаме дека ваквото барање го обременува исполнувањето на одредбата, особено што не е јасно за каков вид на договори може да станува збор кои би биле релевантни за оценување на подобноста на стекнувачот - правно лице. • Во член 10, став 2, точка 1, да се опфати и ситуацијата од член 10 став 1 точка 5 кога акционер кој има значајно влијание може да биде и правно лице, односно за правните лица во насока на нивна идентификација да се доставува тековна состојба или извод од надлежен регистар. • Во член 12 е предвидено дека кон барањето задолжително се доставува и документација која се однесува на угледот и искуството на лицата кои ќе го водат деловното работење на целното друштво, во став 1, точка 3 е предвидено и податоци за работното место на кое лицето е именувано или ќе биде именувано, во став 1 точка 7 пак, се предвидува и изјава за евентуално раскинување на договор за работа или разрешување од вршење на одговорна функција. Сметаме дека од овие одредби не е доволно јасно за кои лица станува збор, односно дали се тоа лица кои ќе бидат членови на органите на управување на друштвото или лица кои се или треба да бидат вработени на одредени позиции во целното друштво. Понатаму, со ваквата одредба се прејудицира дека истовремено со поднесување на барање за стекнување на квалификувано учество задолжително мора да се направат и промени во органите на управување односно во работните позиции кои го водат деловното работење на друштвото, што не мора да значи дека секогаш е цел или интерес на стекнувачот на квалификуваното учество. Оттука, предлагаме членот 12 да се преформулира во насока дека информации за лицата кои ќе го водат деловното работење на целното друштво треба да се достават во рамки на барањето за стекнување на квалификувно учество само доколку стекнувачот има намера да именува нови лица во органите на управување и надзор на друштвото, што е на линија на решенијата во земјите-членки на ЕУ во регионот, како на пример Хрватска. • Во член 13, став 1, точка 5 со цел да се опфати ситуацијата кога нема договор помеѓу стекнувачот и другите акционери или членови во целното друштво, да се додаде и обврската за доставување на изјава заверена на нотар дека не постои таков договор. • Во член 14, став 1 точка 5, се бараат податоци за сите финансиски договори со другите акционери во целното друштво, при што не е јасно за какви договори станува збор. МАКЕДОНСКА БЕРЗА АД СКОПЈЕ

Датум на коментар: 26.08.2024 09:58:01

Коментари на ЦДХВ АД Скопје на Предлог Правилникот за Проспект Во врска со текстот на Правилникот за Проспектот кој е ставен за јавна расправа преку интернет страницата на Комисијата за хартии од вредност, ЦДХВ АД Скопје ги дава следните коментари: Членот 3 став 1, алинеја 1 од Правилникот предвидува доставување на Решение од ЦДХВ за доделување на ИСИН број во случај на издавање на нова емисија, додека во Прилозите се бара ИСИН и депозитар во кој се регистрирани хартиите од вредност. ИСИН бројот се доделува кога издавачот ќе ги предаде хартиите од вредност во депозитарот за нивно регистрирање како што е уредено со членот 268 од Законот за финансиски инструменти. Кај јавните понуди, ИСИН бројот се доделува по исполнување на условите за успешност на понудата (понудата може да биде и неуспешна) како и по уписот на зголемување на основната главнина во Централниот регистар, а кај приватните понуди по уписот на зголемување на основната главнина во Централниот регистар. Доколку се работи за други хартии од вредност издавачот ги предава хартиите од вредност за регистрирање во рок утврден со актот за издавање. Поради ова, и во досегашната пракса и како што е уредено со Правилата за работа на ЦДХВ, се до завршување на целата постапка при јавни понуди се користи друга ознака – СИН – securities identification number, која ги содржи сите потребни елементи за идентификација на хартиите од вредност кои се во процес на издавање, но не може да се смета дека се издадени се до исполнување на условите за тоа. Сметаме дека овие одредби треба соодветно да се изменат, во смисла дека ИСИН бројот издавачот ќе го објави со дополнување на Проспектот или на друг начин, по регистрацијата на хартиите од вредност во Депозитарот или да се избришат бидејќи податоците за доделените ИСИН броеви се достапни преку веб страницата на Депозитарот за сите издавачи кои се евидентирани во неговиот систем. Воедно, депозитарот не носи акти во Управна постапка, на што може да имплицира одредбата од член 3, став 1 алинеја 1.

Датум на коментар: 27.08.2024 16:04:52