Историскиот преглед на богатата ризница на хартии од вредност што се издавале и се користеле на територијата на Македонија во периодот од 1896 година до 2012 година претставува своевидно сведоштво за развојниот пат на хартиите од вредност во Македонија во минатите, речиси 120 години.

Низ овој хронолошки преглед на систематизиран начин се презентирани хартии од вредност (главно, акции и обврзници) што се појавувале на подрачјето на Македонија во период што бил исполнет со бројни политички   и економски предизвици за државата, особено низ патот на нејзината повеќегодишна борба за стекнување самостојност.

Оваа богатата ризница на хартии од вредност го обележува основањето и развојот на пазарот на хартии од вредност во пет периоди според времето на нивното издавање и според карактеристиките на тогашниот општествено-политички статус на Македонија.

Овие хартии од вредност ја отсликуваат нивната иманентност на историските специфики на соодветните временски периоди и на општествено-економските системи во кои тие функционирале. Покрај основните задолжителни содржински елементи на хартиите од вредност, тој факт се констатира и од богатството на нивните уметнички и графички дизајни, боите, презентираната архитектура на нивните лице и опачина и од препознатливиот доминантен правец во областа на уметноста што биле карактеристични за соодветниот период.

На тој начин низ хронолошкиот преглед подолу се презентирани историски највпечатливите хартии од вредност кои претставуваат повеќенасочни траги на минатото.

Богатството на  хартии од вредност што се презентирани подолу може да се определи како уметничка збирка што ќе им биде од непроценливо значење на домашните и на странските историчари, патописци, писатели, уметници, архитекти, правници, економисти, но и на  сите  граѓани  на  државата кои имаат желба да извршат увид во музејската вредност на ризницата на македонските хартии од вредност создавана низ годините наназад. Таквата вредност го сместува овој преглед во документите што ги отсликуваат корените, но и создавањето и растежот на самостојната македонска држава, а во тие рамки и на македонската економија.

Хронолошки прегледи на стари хартии од вредност по периоди:

• Хартии од вредност (1896-1918)
• Хартии од вредност (1919-1941)
• Хартии од вредност (1941-1944)
• Хартии од вредност (1945-1990)
• Хартии од вредност (1990-2012)