Подзаконски акти

Комисијата за хартии од вредност на Република Македонија во јули го усвои Правилникот за изменување на Правилникот за начинот, постапката и потребната документација за добивање дозвола за работење на друштво за управување со инвестициски фондови од времен карактер и истиот го стави на јавна расправа.

Решенија за емисии на акции

Комисијата за хартии од вредност на Република Македонија на акционерското друштво за осигурување ВИНЕР ЛАЈФ-Виена Иншуранс Груп Скопје му даде одобрение да издаде четврта емисија на долгорочни хартии од вредност по пат на приватна понуда. Станува збор за 1.500 обични акции со вкупен износ на емисијата од 1.500.000 евра. Четвртата емисија на акции на ВИНЕР ЛАЈФ-Виена Иншуранс Груп Скопје се врши по пат на зголемување на основната главнина на друштвото со парични влогови и е наменета за единствениот акционер-институционалниот инвеститор, Vienna Insurance Group AG Wiener Versicherung Gruppe, Австрија. Со оваа емисија, ВИНЕР ЛАЈФ-Виена Иншуранс Груп Скопје има цел да изврши усогласување на работењето на Друштвото со Законот за супервизија на осигурување.

Регистар на акционерски друштва со посебни обврски за известување

Во јули, вкупно активни акционерски друштва беа 18. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Согласности на директори на овластени учесници на пазарот на хартии од вредност

Комисијата за хартии од вредност на Република Македонија даде согласност лицето Емилија Брљамова да биде именувана за директор на Службата за услуги со хартии од вредност на НЛБ Тутунска банка АД Скопје со мандат од 4 години. Инаку, Емилија Брљамова и досега ја извршуваше оваа функција.

Спроведени контроли

Во јули, Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал во јули спроведе една вонредна контрола.

Санкции

Поради постапување спротивно на Законот за преземање на акционерските друштва, КХВ на Метал Нет ДОО Куманово, Раде Кончар ТЕП ДООЕЛ Скопје и на лицето Бобан Максимовски им ги ограничи правото на глас и правото на дивиденда на обичните акции кои ги стекнале во Агрокуманово АД Куманово без да дадат понуда за откуп на акции. Комисијата ги задолжи Бобан Максимовски, Метал Нет ДОО Куманово и Раде Кончар ТЕП ДООЕЛ Скопје во рок не подолг од шест месеци да ги оттуѓат обичните акции на кои им е ограничено правото на глас и на дивиденда. Откако се утврди дека лицето Блаже Филиповски го прекршил Законот за преземање на акционерските друштва, на обичните акции кои ги стекнал во Технокомерц АД Скопје спротивно на законската регулатива, КХВ му ги ограничи правото на глас и на дивиденда и го задолжи истите да ги продаде.

Активности по барања на акционери за заштита на правата

Секторот за супервизија на пазарот на капитал постапуваше по едно барање за заштита на акционерско право.