Активности по барања на акционери за заштита на правата

Секторот за супервизија на пазарот на капитал постапуваше по три барања за заштита на акционерско право.

Подзаконски акти

Комисијата за хартии од вредност на Република Македонија во април усвои неколку правилници и истите ги стави на јавна расправа. Станува збор за : 1. Правилник за изменување и дополнување на Правилникот за формата и содржината на барањето за добивање одобрение за организирање на отворен инвестициски фонд; 2. Правилник за изменување и дополнување на Правилникот за начинот, постапката и потребната документација за добивање дозвола за работење на друштвото за управување со инвестициски фондови; 3. Правилник за изменување и дополнување на Правилникот за потребната документација за добивање согласност за стекнување на квалификувано учество во друштво за управување со инвестициски фондови ; 4. Правилник за изменување и дополнување на Правилникот за формата и содржината на барањето за добивање одобрение за основање на затворен инвестициски фонд ; 5. Правилник за изменување и дополнување на Правилникот за начинот, постапката и потребната документација за добивање дозвола за основање на подружница на странско друштво за управување со инвестициски фондови во Република Македонија; 6. Правилник за изменување и дополнување на Правилникот за формата, содржината и начинот на водење на Регистарот на инвестициски фондови и начинот на утврдување на идентификациски број на инвестициоскиот фонд; 7. Правилник за изменување и дополнување на Правилникот за формата и содржината на барањето за добивање на одобрение за избор на депозитарна банка; 8. Правилник за изменување и дополнување на Правилникот за потребна документација која се приложува како доказ за исполнување на условите за именување на членови на управниот одбор односно извршни членови на одборот на директори на друштво за управување со инвестициски фондови ; 9. Правилник за изменување и дополнување на Правилникот за формата и содржината на проспектот на отворен и затворен инвестициски фонд; 10. Правилник за изменување и дополнување на Правилникот за формата и содржината на скратената форма на проспектот на отворен инвестициски фонд.

Решенија за емисии на акции

Во април, Комисијата за хартии од вредност на Република Македонија донесе Решение со кое на Реплек АД Скопје му даде одобрение да продаде сопствени акции и тоа 1.580 обични акции во вкупен износ од 71.100.000 денари. Сопствените акции кои се предмет на продажба претставуваат 8,0246% од основната главнина на Друштвото. Продажбата на сопствени акции се врши по пат на приватна понуда наменета за познат купувач – правното лице СИТИКО Антонио ДООЕЛ Скопје.

Супервизорски активности

Во април, Комисијата за хартии од вредност на Република Македонија даде согласност на измените и дополнувања на Статутот на ДУИФ Иново Статус АД Скопје.

Согласности за директори на овластени учесници на пазарот на хартии од вредност

Комисијата за хартии од вредност на Република Македонија даде согласност на лицето Дарко Сима да биде именуван за директор на Дирекцијата за работа со хартии од вредност при ТТК Банка АД Скопје.

Регистар на акционерски друштва со посебни обврски за известување

КХВ донесе решение за бришење на Акционерското друштво Рудници и Железарница СКОПЈЕ-ФАМОРД Фабрика за машинска опрема и резервни делови од Регистарот на АДПОИ. Инаку, во април, вкупно активни акционерски друштва беа 19. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Дозволи за брокер

Во април, Комисијата за хартии од вредност на Република Македонија обнови една дозвола за работење со хартии од вредност и тоа на Тања Поповска.

Спроведени контроли

Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал во април спроведе три вонредни контроли.

Санкции

А) Брокерски куќи Врз основа на член 194 став 1, 3 и 5, член 197 став 1 алинеи в) и ѓ) и став 2 алинеја а) и член 206 став 1 алинеи г) и д) од Законот за хартии од вредност, Комисијата за хартии од вредност на Република Македонија трајно му ја одзема согласноста за директор на лицето Велимир Шиповиќ, одговорно лице (директор) на брокерската куќа Иново брокер АД Скопје и изрече привремена забрана на брокерската куќа Иново брокер АД Скопје за вршење на сите услуги со хартии од вредност за кои има добиено дозвола од Комисијата за хартии од вредност на Република Македонија, во времетраење од 30 работни дена. Оваа санкција, КХВ ја изрече поради: - непочитување на Правилата за тргување на Македонската берза АД Скопје, и на Законот за хартии од вредност, поради изготвување налози за продавање на акции издадени од Фершпед АД Скопје во блок трансакција за вкупно 34 клиенти, во периодот од 24.12.2013 година до 25.12.2013 година, врз основа на изготвени договори за купопродажба на акции, кои се потпишани само од едната страна-продавачите и во кои не е познат купувачот и - непочитување на Правилата за работа на Централниот депозитар за хартии од вредност АД Скопје и на Законот за хартии од вредност, поради извршени резервации на акции издадени од Фершпед АД Скопје за 81 акционер од кои нема примено налози за продавање, односно за 81 акционер за кои нема евидентирано налози за продавање во книгата на налози, во периодот од 01.12.2013 година до 26.12.2013 година. Б) Брокери Комисијата за хартии од вредност на Република Македонија им изрече јавна опомена на овластените брокери Тони Павловски и Владимир Спасовски, вработени во Комерцијална банка АД Скопје-Дирекција за вршење услуги со хартии од вредност поради непочитување на Правилата за работа на Централниот депозитар за хартии од вредност АД Скопје. В) Акционерски друштва Комисијата за хартии од вредност на Република Македонија донесе решениja со кои задолжи неколку правни и физички лица со следново: - Друштвото Раде Кончар Контактори и релеи ДОО Скопје во рок не подолг од 6 месеци од денот на правосилноста на Решението да продаде 5112 акции кои ги поседува во друштвото Раде Кончар Апаратна Техника АД Скопје, на кои им е ограничено правото на глас и дивиденда; - Друштвото Раде Кончар Заеднички дејности ДОО Скопје во рок не подолг од 6 месеци од денот на правосилноста на Решението да продаде 691 акција кои ги поседува во друштвото Раде Кончар Апаратна Техника АД Скопје, на кои им е ограничено правото на глас и дивиденда. - Лицето Злате Поповски во рок не подолг од 6 месеци од денот на правосилноста на Решението да продаде 3 акции кои ги поседува во друштвото Раде Кончар Апаратна Техника АД Скопје, на кои им е ограничено правото на глас и дивиденда; - Лицето Горан Јанчиќ во рок не подолг од 6 месеци од денот на правосилноста на Решението да продаде 1 акција која ја поседува во друштвото Раде Кончар Апаратна Техника АД Скопје, на која и е ограничено правото на глас и дивиденда. Доколку физичките и правните лица не постапат по Решенијата, по нивната правосилност, продажбата на акциите ќе ја спроведе Комисијата согласно член 57 и член 58 од Законот за преземање на акционерски друштва.