Спроведени контроли

Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал спроведе две редовни и една вонредна контрола.

Супервизорски активности

Комисијата за хартии од вредност на Република Македонија даде согласност Велимир Шиповиќ да биде именуван за директор на брокерската куќа Иново Брокер АД Скопје со мандат од четири години.

Активности по барања на акционери за заштита на правата

Секторот за супервизија на пазарот на капитал постапуваше по четири барања за заштита на акционерско право.

Меѓународна соработка

Претседателот на Комисијата за хартии од вредност на РМ, М-р Елизабета Чингаровска учествуваше на овогодинешната 38-ма Годишна Конференција на Меѓународната Организација на Комисиите за хартии од вредност (International Organization of Securities Commissions - IOSCO) која се одржа во Луксембург, во периодот од 15-19 септември. Ова беше можност на едно место да се сретнат релевантните светски креатори на политики и одлуки и претставници од супервизорските тела на пазарите на капитал и хартии од вредност. Исто така, Претседателот на Комисијата за хартии од вредност на Република Македонија беше панелист на една од дебатите на Милочерски развоен форум "Економска криза, образование и вработување на млади луѓе" кој го организираше Асоцијацијата на економисти на Република Црна Гора.

Соработка со други институции

Комисијата за хартии од вредност на Република Македонија и Советот за унапредување и надзор на ревизијата потпишаа Меморандум за соработка. Со овој документ се овозможува меѓусебна размена на информации и податоци со кои располагаат Комисијата за хартии од вредност на Република Македонија и Советот за унапредување и надзор на ревизијата , а кои можат да го унапредат работењето на двете институции.

Подзаконски акти

Комисијата за хартии од вредност на Република Македонија по завршена јавна расправа ги усвои следните Правилници: Правилник за документацијата што се поднесува кон барањето за издавање дозвола за понуда за преземање ; Правилник за содржината на проспектот за преземање; Исто така, КХВ усвои пет Предлог-правилника и тоа: 1. Правилник за начинот и постапката за вршење контрола на овластените учесници на пазарот на хартии од вредност " 2. Правилник за критериумите за утврдување на заедничко дејствување " 3. Правилник за условитe кои треба да ги исполнуваат хартиите од вредност за замена 4. Правилник за изменување и дополнување на Правилникот за формaтa и содржинaтa нa проспектот и покaнaтa зa зaпишувaње и уплaтa нa хaртии од вредност (од времен карактер); 5. Правилник за изменување и дополнување на Правилникот за документите што ги доставува издавачот на хартии од вредност при поднесување на барањето за одобрение за јавна понуда на хартии од вредност (од времен карактер); Овие правилници Комисијата ги стави на јавна расправа со цел пошироката јавност да ги каже своите забелешки, предлози и сугестии, по што предложените акти повторно ќе се најдат на дневен ред на Комисијата за хартии од вредност на Република Македонија.

Регистар на акционерски друштва со посебни обврски за известување

КХВ донесе решение за бришење на едно акционерско друштво од Регистарот на акционерски друштва со посебни обврски за известување, поради прием на котација на официјалниот пазар на Македонска берза АД Скопје на подсегментот задолжителна котација.