Подзаконски акти

Комисијата за хартии од вредност на Република Македонија ги разгледа и утврди следните предлог Правилници: Предлог Правилник, за содржината, начинот на водење и постапката за запишување на овластените ревизори во Регистарот на овластени ревизори кои даваат мислење во постапка на одобрување на зделка со заинтересирана страна; Предлог Правилник за поблиску пропишување на условите и потребната документација која се приложува како доказ за исполнување на условите за овластен ревизор за давање мислења во постапка за одобрување на зделка со заинтересирана страна; и Правилник , за содржината и формата на мислењето што овластениот ревизор го дава во постапка на одобрување на зделка со заинтересирана страна. Овие Предлог-Правилници се објавени на веб-страницата на КХВ за јавна расправа.

Решенија за емисии на акции

Комисијата за хартии од вредност на Република Македонија на Друштвото за управување со инвестициски фондови КБ Публикум Инвест АД Скопје му даде одобрение да издаде втора емисија на долгорочни хартии од вредност по пат на приватна понуда. Се работи за 200 обични акции со вкупна вредност на емисијата од 200.000 евра. Зголемувањето на основната главнина на Друштвото се реализира со уплата на нови парични влогови од страна на постојниот акционер Комерцијална банка АД Скопје како институционален инвеститор и тоа за обезбедување услови за непречено вршење на редовното работење на Друштвото и за постигнување на законски предвидената адекватност на капиталот. Комисијата за хартии од вредност на Република Македонија донесе Решение со кое на Акционерското друштво за осигурување Винер Лајф - Виена Иншуранс Груп АД Скопје му ја одобри третата емисија на акции по пат на приватна понуда. Со третата емисија, Акционерското друштво за осигурување Винер Лајф - Виена Иншуранс Груп АД Скопје издаде 1.000 обични акции, со продажна цена од 1.000 евра по акцијa. Третата емисија на акции на Друштвото се врши по пат на зголемување на основната главнина со парични влогови и е наменета за единствениот акционер-институционален инвеститор Vienna Insurance Group AG Wiener Versicherung Gruppe, Република Австрија.

Преземање на акционерски друштва со посебни обврски за известување

Комисијата за хартии од вредност на Република Македонија на Виена Иншуренс Груп АГ Винер Ферзихерунг Групе и даде дозвола да ги откупи сите акции издадени од Друштвото за осигурување и реосигурување КЈУБИ Македонија АД Скопје. Понудата за откуп се однесува на 636.645 обични акции со право на глас и на 80.817 приоритетни акции, сите издадени од Осигурување КЈУБИ Македонија АД Скопје. Австрискиот понудувач се обврзува да ги откупи хартиите од вредност по цена од 2.001,22 денари за една акција. Виена Иншуренс Груп АГ Винер Ферзихерунг Групе на сметка на Централниот депозитар за хартии од вредност АД Скопје има депонирано паричен износ кој е потребен за плаќање на сите хартии од вредност на кои се однесува понудата. Најмалата количина на хартии од вредност што треба да се прифати, за понудата за откуп да се смета за успешна е 73,51 % од обичните акции.

Регистар на акционерски друштва со посебни обврски за известување

A. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Согласности на директори на овластени учесници на пазарот на хартии од вредност

Комисијата за хартии од вредност на Република Македонија даде согласност Иван Штериев да биде именуван за Главен Извршен директор на Македонската берза АД Скопје, со мандат од 4 години.

Дозволи за брокери

Комисијата за хартии од вредност на Република Македонија обнови една дозвола за работење на брокер и тоа на Александар Домазетовски.

Активности по барања на акционери за заштита на правата

Секторот за супервизија на пазарот на капитал во февруари постапуваше по 5 (пет) барања за заштита на акционерско право.