Решенија за емисии на акции

Комисијата за хартии од вредност на Република Македонија на “Клириншка куќа Клириншки интербанкарски системи“ АД Скопје и даде одобрение да ја издаде десеттата емисија на долгорочни хартии од вредност, наменета за познати купувачи -акционерите на друштвото. Станува збор за 876 обични акции во вкупна вредност на емисијата од 8.760.000 денари. Десеттата емисија на акции се врши од средства на друштвото по основ на исплата на дивиденда во акции на акционерите на КИБС АД Скопје, сразмерно на нивното учество во основната главнина на друштвото.

Регистар на акционерски друштва со посебни обврски за известување

Во мај, вкупно активни акционерски друштва се 146. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери или се котирани на овластената берза, односно исполнувањето на било кој од овие услови поединечно од страна на едно акционерско друштво, значи негово запишување во Регистарот на Комисијата.

Дозволи за брокери

Во мај, Комисијата обнови три дозволи за брокер. И тоа на: Томо Томовски, Иван Ортаковски и Зорица Пиперковска.

Супервизорски активности

Комисијата за хартии од вредност на Република Македонија даде согласност на измените на Статутот, Проспектот и Скратениот проспект на отворените инвестициски фондови КД Брик и КД Нова ЕУ, со кои управува Друштвото за управување со инвестициски фондови “КД Фондови“ АД Скопје.

Дозволи на директори на овластени учесници на пазарот на хартии од вредност

Комисијата за хартии од вредност на Република Македонија даде согласност Елена Јакимовска Петровска да биде именувана за извршен директор на Централниот депозитар за хартии од вредност АД Скопје. Мандатот ѝ е до 23 март, 2015 година. Елена Јакимовска Петровска е втор по ред директор на Централниот депозитар за хартии од вредност АД Скопје од основањето на оваа институција. КХВ даде согласност Атанас Стојчески да биде именуван за директор на Одделот за работа со хартии од вредност при експозитура во Скопје на Охридска банка АД Охрид, со мандат од 3 години кој почнува да тече од денот на добивање согласност од страна на Комисијата за хартии од вредност. Комисијата даде согласност Миа Стефановска- Зографска и Благој Митров да бидат именувани за извршни членови на Одборот на директори на Друштвото за управување со инвестициски фондови “Иново Статус“АД Скопје. Со тоа, во наредните четири години главен извршен директор на Друштвото за управување со инвестициски фондови “Иново Статус“АД Скопје останува да биде Миа Стефановска- Зографска, а извршен директор Благој Митров.

Спроведени контроли

Комисијата за хартии од вредност и во мај секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал спроведе две редовни и три вонредни контроли на овластени учесници на пазарот на хартии од вредност.

Активности по барања на акционери за заштита на правата

Секторот за супервизија на пазарот на капитал во мај постапуваше по 2 (две) барања за заштита на акционерски права.

Санкции

А) Брокерски куќи -Комисијата за хартии од вредност на Република Македонија трајно и ја одзема дозволата за работа со хартии од вредност на брокерската куќа “БРО-ДИЛ” АД Скопје, поради донесена одлука за престанок на брокерската куќа од страна на Собранието на акционери. Истовремено, со трајното одземање на дозволата за работа на “БРО-ДИЛ” АД Скопје се исполнуваат условите за отворање на ликвидација на брокерската куќа, за што Комисијата за хартии од вредност на Република Македонија поведе постапка пред надлежниот суд. - Комисијата согласно Законот за хартии од вредност изрече привремена забрана на брокерската куќа“ Битола Брокер“ АД Битола за вршење на сите услуги со хартии од вредност за кои има добиено дозвола од КХВ во времетраење од 30 работни дена, поради ненавремена исплата на парични средства на клиент, чии акции му ги продале.

Меѓународна соработка

Претседателот на КХВ Марина Наќева-Кавракова учествуваше на 37-мата Годишна Конференција на IOSCO што се одржа во Пекинг, НР Кина во периодот од 12-19 мај 2012 година.