Извештај на Комисијата за хартии од вредност на Република Македонија ( КХВ на РМ) за јануари 2018 година

08.02.2018

Решенија за емисии на акции

Комисијата за хартии од вредност на Република Македонија на ,,Охридска банка ,, АД Скопје и даде одобрение да издаде 12-та емисија на долгорочни хартии од вредност за познат купувач.

Станува збор за 77.764 обични акции со вкупна продажна вредност од 430.501.504 денари. Банката издава нови хартии од вредност заради одржување на соодветно ниво на стапка на редовен основен капитал и стапка на основен капитал, како и заштитните слоеви на капиталот пропишани со Законот за банки и подзаконската регулатива. Купувач на акциите од 12-та емисија е институционалниот инвеститор – Банката ,,Сосиете Женерал,,СА (Societe Generale SA) со седиште во Париз, Република Франција.

Регистар на акционерски друштва со посебни обврски за известување

Во јануари , КХВ донесе Решение за бришење на ,,Трикотажа Пелистер,, АД Битола од Регистарот на акционерски друштва со посебни обврски за известување заради стечај. Со бришењето на ,,Трикотажа Пелистер ,,АД Битола, бројот на вкупно активни акционерски друштва во Регистарот на акционерски друштва со посебни обврски за известување што го води Комисијата изнесува 11. Инаку, во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Регистар на приватни инвестициски фондови

КХВ одобри приватниот отворен фонд ,,Редгласс инвестментс,, да се запише во Регистарот на приватни фондови што го води Комисијата. Со овој приватен фонд ќе управува Друштвото за управување со приватни фондови ,,Есторил Инвестмент,, ДООЕЛ Скопје.

Дозволи за инвестициски советник

Во јануари КХВ на Емилија Вукиќевиќ и ја обнови дозволата за работење на инвестициски советник.

Супервизорски активности

Комисијата за хартии од вредност на Република Македонија даде одобрение на Одлуката за измени на Правилата за тргување на Македонска берза АД Скопје, со што наместо досега применуваниот период на порамнување од три работни дена (Т+3) од денот на склучување на трансакцијата се воведува период на порамнување од два работни дена (Т+2) од денот на склучување на трансакцијата.Со примената на ваков стандарден период на порамнување Т+2, македонскиот пазар на хартии од вредност ја следи праксата на порамнување што важи на европските регулирани пазари.

На овој начин се очекува да се намали потребата од барање на специјален ден на порамнување, да се динамизира тргувањето и да се зголеми ликвидноста на пазарот, да се овозможи побрз тек на парите на инвеститорите и пренос на хартиите од вредност. Исто така, воведувањето на Т+2 е од особена важност за СЕЕ Линк платформата.

Ваквата корекција на Правилата за тргување на Македонската берза АД Скопје е во согласност со Законот за хартии од вредност, кој го регулира времето на порамнување на трансакциите и нормира дека порамнувањето може да се врши веднаш, но не подоцна од три работни дена од денот на склучувањето на трансакцијата.

Исто така во јануари, КХВ даде согласност на Статутите на отворените инвестициски фондови со кои управува ДУИФ ,,КД Фондови,,АД Скопје и тоа на КД Топ Брендови, КД Нова ЕУ, КД БРИК и на КД Кеш Депозит, а ги одобри и измените и дополнувањата на Проспектите на КД Топ Брендови; КД Нова ЕУ; КД БРИК и на КД Кеш Депозит.

Активности по барања на акционери за заштита на нивните права

Секторот за супервизија на пазарот на капитал во јануари постапуваше по едно барање за заштита на акционерско право.