Комисијата за хартии од вредност на Република Македонија на  ,,Агромеханика,, АД Скопје и даде одобрение за продажба на сопствени акции по пат на јавна понуда.  Станува збор за 5.247 обични акции со вкупна минимална продажна вредност од 14.691.600 денари.  Минималната продажна цена по акција изнесува 2.800 денари.Продажбата/оттуѓувањето на сопствените акции се реализира согласно моделот на минимална цена , при што приоритет се дава на налози со повисока цена , поголема количина и порано време на внес на налогот. Бројот на акциите кои се предмет на понудата претставува 12,96 % од вкупниот број на издадени акции од ,,Агромеханика,, АД Скопје кој изнесува 40.481 обични акции. Продажбата на сопствени акции, ,,Агромеханика,, АД Скопје ја врши заради задоволување на законската регулатива. Јавната понуда ќе се смета за успешна доколку во утврдениот рок се оттуѓат најмалку 60 % од понудените акции. 

    Исто така,  КХВ  на ,,Капитал банка,, АД Скопје и даде одобрение да издаде корпоративна обврзница за познати купувачи. Станува збор за прва емисија на 1000 обврзници со поединечна номинална вредност од 1000 евра и со вкупна вредност од 1.000.000 евра. Обврзницата што се издава е долгорочна со каматен принос (купонска), во нематеријализиран облик, неконвертибилна, гласи на име и е неограничено пренослива.

    Емисијата на обврзници на ,,Капитал банка,, АД Скопје се врши заради зголемување на капиталот и сопствените средства на друштвото, подобрување на профитабилноста, проширување на портфолиото на услуги кои се нудат, како и за инвестиции во ИТ решенија за изградба на дигитални платформи за онлајн услуги на банката.     Купувачи на обврзниците од првата емисија се : Алфа банка ЕАД ,Софија, Бугарија која ќе откупи 90 проценти од понудените обврзници, како  и  двата инвестициски фонда КБ Публикум-балансиран   и КБ Публикум- обврзници од  Скопје со по 5 проценти.