Подзаконски акти

Комисијата за хартии од вредност на Република Македонија во јули и во август разгледа неколку предлог Правилници. И тоа: По завршена јавна расправа го усвои Правилникот за измени и дополнување на правилникот за критериумот за рангирање на субдепозитарна банка на инвестициски фонд; Исто така, КХВ ги разгледа и усвои следниве Предлог Правилници по што ги стави на јавна расправа. Се работи за: -Предлог Правилник за изменување и дополнување на Правилникот за подетално пропишување на условите и потребната документација за исполнување на условите за овластен ревизор кој дава мислење во постапка за одобрување на зделка со заинтересирана страна ; - Предлог Правилник за изменување и дополнување на Правилникот за содржината и формата на мислењето што овластениот ревизор го дава во постапката за одобрување на зделка со заинтересирана страна кај акционерско друштво чии хартии од вредност котираат на берза;

Регистар на акционерски друштва со посебни обврски за известување

Во јули и во август , вкупно активни акционерски друштва беа 17. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Преземање на акционерски друштва

Комисијата донесе Решение со кое понудата за преземање на акциите издадени од "Жито Караорман" АД Кичево дадена од страна на Сретен Миладиноски се утврдува како успешна. Врз основа на оваа понуда, преземачот се има стекнато со вкупно 2.975 обични акции и заедно со акциите што веќе ги поседуваше (2.625 обични акции) има вкупно 5.600 хартии од вредност што претставува учество од 50,67 % од вкупниот број на обични акции издадени од "Жито Караорман" АД Кичево. Понудата за преземање била прифатена од вкупно тројца сопственици на обични акции со право на глас во "Жито Караорман" АД Кичево.

Супервизорски активности

Комисијата за хартии од вредност на Република Македонија донесе одлука по барањето на ДУИФ Илирика Фунд Менаџмент АД Скопје за добивање согласност за пренос на работите во врска со водење на деловни книги и сметки и изготвување на финансиски извештаи на трети лица.

Согласности на директори на овластени учесници на пазарот на хартии од вредност

Комисијата за хартии од вредност на Република Македонија даде согласност Ѓорги Палевски да биде директор на брокерската куќа "Поштел брокер" АД Скопје со мандат од четири години.

Спроведени контроли

Во јули и во август, Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал спроведе една контрола.