Подзаконски акти

Комисијата за хартии од вредност на Република Македонија во јуни по завршена јавна расправа го усвои Правилникот за измена и дополнување на Правилникот за формата, содржината и начинот наводење на Регистарот на инвестициски фондови и начинот на утврдување на идентификацискиот број на инвестицискиот фонд. КХВ го усвои Предлог- Правилникот за измени на правилникот за критериумот за рангирање на субдепозитарна банка на инвестициски фонд како акт од времен карактер и истиот го стави на јавна расправа.

Регистар на акционерски друштва со посебни обврски за известување

Во јуни , вкупно активни акционерски друштва беа 17. Во Регистарот се запишуваат друштвата кои се основани и работат во Република Македонија и притоа извршиле јавна понуда на хартии од вредност или имаат основна главнина од 1.000.000 евра во денарска противвредност и повеќе од 50 акционери, освен друштвата котирани на берза.

Преземање на акционерски друштва

Комисијата за хартии од вредност на Република Македонија на лицето Сретен Миладиноски му издаде дозвола да даде понуда за преземање на "Жито Караорман" АД Кичево. Понудата за преземање се однесува на 8.426 обични акции со право на глас и 126 приоритетни кумулативни акции, сите издадени од "Жито Караорман" АД Кичево. Преземањето на хартиите од вредност е по цена од 1000,00 денари по акција. Понудената купопродажна цена се однесува на двата родови акции издадени од "Жито Караорман" АД Кичево. Најмалата количина на обичните акции кои треба да бидат откупени за понудата да биде успешна е 691 обични акции, што претставува 6,25% од вкупниот број на обични акции издадени од "Жито Караорман" АД Кичево. Имено, вкупниот број на обични акции на "Жито Караорман" АД Кичево кој преземачот треба да го стекне заедно со хартиите од вредност кои веќе ги поседува треба да изнесува 30%. За приоритетните кумулативни акции на кои се однесува Понудата за преземање, преземачот не определил најмала количина која треба да се прифати за понудата да се смета за успешна. Комисијата за хартии од вредност на Република Македонија донесе Решение со кое понудата за преземање на акции издадени од ФЗЦ 11 Октомври АД Куманово дадена од понудувачот Квалитет Пром ДООЕЛ Куманово се утврдува за успешна . Понудата за преземање била прифатена од вкупно 90 сопственици на обични акции со право на глас во ФЗЦ 11 Октомври АД Куманово кои поседуваат 262.267 обични акции , што претставува 56,69 проценти од вкупниот број на обични акции со право на глас, односно 53,41 проценти од вкупниот број издадени акции од ФЗЦ 11 Октомври АД Куманово. Инаку, најмалата количина на обичните акции кои требаше да бидат откупени за понудата да биде успешна е 234.158 акции, односно 50,62% од вкупниот број на обични акции. Со надминување на овој праг, понудата за преземање е успешна. Преземањето на хартиите од вредност се врши по цена од 550,00 денари по акција.

Согласности на директори на овластени учесници на пазарот на хартии од вредност

Во јуни, КХВ на Коста Костадиновски и на Јован Дојчиновски им даде согласност да бидат именувани за извршни членови на Друштвото за управување со инвестициски фондови Илирика Фунд Менаџмент АД Скопје. Имено, Коста Костадиновски да биде Главен извршен директор, а Јован Дојчиновски извршен директор. Согласно Одлуката на Собранието на акционери на Друштвото за управување со инвестициски фондови Илирика Фунд Менаџмент АД Скопје, Комисијата за хартии од вредност на Република Македонија одобри Коста Костадиновски и Јован Дојчиновски да имаат мандат од две години. Исто така, во јуни КХВ даде согласност Андреј Богдановски да биде именуван за директор на брокерската куќа "Иново Брокер" АД Скопје со мандат од четири години.

Спроведени контроли

Во јуни , Комисијата за хартии од вредност секојдневно он-лине во реално време го следеше тргувањето на берзата и вршеше постојана посредна и непосредна контрола на овластените учесници на пазарот на хартии од вредност. Секторот за супервизија на пазарот на капитал спроведе три контроли.

Активности по барања на акционери за заштита на нивните права

Секторот за супервизија на пазарот на капитал во јуни постапуваше по три барања за заштита на акционерско право.